चकली (अंदाजे ३०-३५ चकल्यांसाठी )
(सर्व सामग्री रेखांकित केली आहे)
१. एका कढईत २ वाट्या पाणी उकळायला ठेवावे. पाण्यात ३ टीस्पून तेल, १ टीस्पून तीळ, चवीप्रमाणे तिखट (अंदाजे १ &१/२ टीस्पून), १/२ टीस्पून हळद व चवीप्रमाणे मीठ (अंदाजे १ & १/२ टीस्पून) घालावे.
२. पाण्याला उकळी आल्यावर, गॅस बंद करून त्यात २ वाट्या चकलीची भाजणी* घालावी व सर्व चांगले मिसळावे.
३. कढईवर झाकण ठेऊन १५-२० मिनिटे पीठ झाकून ठेवावे. नंतर पीठ हाताने चांगले मळून चकलीच्या सोऱ्याने प्लास्टिक किंव्हा पार्चमेंट पेपर वर चकल्या पडाव्यात.
४. एकावेळी ४-५ चकल्या गरम तेलात तळून काढाव्यात. तळताना तेल मध्यम गरम असायला हवे. खूप गरम झाल्यास चकल्या आतून मऊ पडतात किंव्हा खूप मंद तळल्यास चकल्या फिसकटू शकतात.
*चकलीच्या भाजणीसाठी :
४ वाट्या तांदूळ, २ वाट्या हरभऱ्याची डाळ , १ वाटी उडदाची डाळ, १/२ वाटी धने, १/४ वाटी जिरे घ्यावेत. सर्व पदार्थ वेगवेगळे मूठ शेकी म्हणजे थोडे, किंचित गुलाबी रंगावर, भाजावेत. पूर्ण गार झाल्यावर अगदी बारीक दळावेत व मिसळावेत. तयार पिठाला चकलीची भाजणी असे म्हणतात.
कोणत्याही टिप्पण्या नाहीत:
टिप्पणी पोस्ट करा